Стубб: Ватиканда Украина-Россия музокаралари ўтказилиши мумкин

Финляндия президентининг сўзларига кўра, урушни тугатиш бўйича «техник» музокаралар бир неча кундан кейин давом этиши мумкин. Стуббнинг айтишича, АҚШ музокара жараёнини тарк этмаяпти, Европа эса унга қўшилмоқда.

Фото: Eeva Eronen / Yle

Финляндия президенти Александр Стубб урушни тугатиш бўйича Украина ва Россия расмийлари ўртасидаги «техник» музокаралар бир неча кундан кейин Ватиканда давом этиши мумкинлигини айтди. Шу билан бирга, финляндиялик сиёсатчи АҚШ музокаралар жараёнидан чиқмаётганини айтди.

«Улар таслим бўлмадилар. Энди воситачилар кўпайди. Илгари бу ролни фақат АҚШ ўйнаган бўлса, энди Европа ҳам қўшилмоқда», — дея Стубб сўзларини келтиради Yle. Финляндия президенти буни яхши ҳолат деб атади.

Стуббнинг сўзларига кўра, АҚШ президенти Доналд Трамп билан унинг украиналик ва россиялик ҳамкасблари Володимир Зеленский ва Владимир Путиннинг 19 май, душанба куни бўлиб ўтган суҳбатидан сўнг муҳокамалар «турли даражаларда» давом этган.

19 май куни Трамп Россия президенти Владимир Путин билан телефон суҳбатидан сўнг Россия ва Украина ўртасидаги музокаралар «дарҳол» бошланишини айтди. Оқ уй раҳбари бу ҳақда Украина президенти Володимир Зеленскийга, шунингдек, Еврокомиссия раиси Урсула фон дер Ляйен, Франция президенти Эммануэл Макрон, Италия бош вазири Жоржа Мелони, Германия канцлери Фридрих Мерц ва Финляндия раҳбари Александр Стуббга хабар берди.

#Украина #Россия #Ватикан #Александр Стубб