Путин Украинага тўғридан тўғри музокараларни тиклашни таклиф қилди

«Киев расмийларига 2022 йил охирида улар томонидан тўхтатилган музокараларни қайта бошлашни таклиф қиламиз. Тўғридан тўғри музокараларни, ҳеч қандай дастлабки шартларсиз бошлаш лозимлигини таъкидлайман. Музокараларни келаётган пайшанба, 15 май куниёқ Истанбулда бошлаш таклифини билдирамиз. Улар олдин ҳам шу ерда ўтказилган ва тўхтатилган эди», — дейди Путин 10 май куни кечаси Кремлдаги чиқишида.

Путин, шунингдек, Туркия президенти Ражаб Тоййиб Эрдўған билан ушбу музокараларни ташкил қилиш масаласида суҳбатлашишни режалаштираётганини маълум қилди.

«Эртага бизда Туркия президенти жаноб Эрдўған билан суҳбат режалаштирилган. Мен ундан музокаралар ўтказилиши учун Туркияда шароит яратиб беришини илтимос қиламан. Умид қиламанки, у Украина бўйича тинчлик йўлини излашга ёрдам бериш истагини тасдиқлайди», — дейди Путин.

Путин, шунингдек, Россия Украина билан «жиддий музокараларга тайёр» эканини таъкидлади.

«Бу музокараларнинг мақсади — можаронинг асосий сабабларини бартараф этиш ва узоқ муддатли, мустаҳкам тинчликка эришишдир. Музокаралар давомида янги сулҳлар ёки ўт очишни тўхтатиш бўйича ҳақиқий келишувларга ҳам эришиш мумкинлигини истисно этмаймиз», — дея қўшимча қилади Россия президенти.

10 май куни Украина расмийлари душанба кунидан бошлаб «қуруқликда, ҳавода ва денгизда камида 30 кунлик тўлиқ ва сўзсиз ўт очишни тўхтатиш»га тайёр эканликларини эълон қилди. Бу қарор Франция президенти Эммануэл Макрон, Полша бош вазири Доналд Туск, Буюк Британия бош вазири Кир Стармер ва Германия мухолифати етакчиси Фридрих Мерцнинг Киевга ташрифидан сўнг маълум қилинди.

Киевдаги музокаралардан кейинги матбуот анжуманида Буюк Британия бош вазири Кир Стармер агар Владимир Путин тинчлик ҳақида ўйлаётган бўлса, ҳозир — бу ниятни намойиш этиш учун энг яхши вақтлигини таъкидлади. «Путин тинчлик ўрнига шартлар қўймоқда, ўт очишни тўхтатиш ўрнига ҳарбий парад ўтказди, бу билан яна бир бор чақириқ ташламоқда… Агар Путин тинчлик йўлига қайтмаса, биз жавоб қайтарамиз. Президент Трамп билан биргаликда Украина мудофаа салоҳиятини янада кучайтирамиз ва Россияни музокара столига мажбурлаймиз», — деганди Стармер.