Франция ва Полша икки давлат ўртасида дўстлик шартномасини имзолади

Франция президенти Эммануэл Макрон ва Полша бош вазири Доналд Туск 9 май, жума куни Франциянинг Нанси шаҳрида ўз мамлакатлари ўртасидаги дўстлик шартномасини имзоладилар. Унда биринчи навбатда мудофаа, энергетика ва инфратузилма соҳаларида яқин ҳамкорлик кўзда тутилган.

Туск, айниқса, ўзаро қўллаб-қувватлаш ҳақидаги келишув бандларини олқишлади. Макрон, шунингдек, қўшма ҳарбий машғулотлар ўтказилишини маълум қилди, дея хабар беради AFP.

Кейинроқ Франция президенти, Полша ва Буюк Британия бош вазирлари, Германия канцлери Киевга кетаётгани маълум бўлди. Бу ҳақда Эммануэл Макрон, Доналд Туск, Фридрих Мерц ва Кир Стармер қўшма баёнотда маълум қилди.

Европа давлатлари етакчилари Киевга 10 май, шанба куни эрталаб етиб келиши кутилмоқда. AFP агентлиги мухбирининг хабар беришича, сиёсатчилар Полшада Украина билан чегарага яқин жойда поездга чиқишган. Бу Мерцнинг канцлер сифатида мамлакатга биринчи ташрифи.