Намангандаги метан заправкада Damas ёниб кетди

Вилоят ФВБ ҳолат юзасидан терговга қадар суриштирув ишлари олиб борилаётганини маълум қилди.

Фото: Наманган вилояти Фавқулодда вазиятлар бошқармаси

Наманган вилояти Фавқулодда вазиятлар бошқармаси Давлатобод туманидаги заправкада юз берган ёнғин тўғрисида маълумот берди.

Қайд этилишича, бугун, 25 март куни соат 17:58 да Давлатобод тумани «Нуробод» МФЙ Қуқумбой шоҳкўчасида жойлашган автомобилларга газ қуйиш шохобчасида Damas русумли автомобилда ёнғин содир бўлгани тўғрисида ФВБга хабар келиб тушган.

Шунга асосан, ёнғин-қутқарув экипажи соат 18:03 да ҳодиса жойига етиб борган ва соат 18:06 да ёнғин бартараф этилган.

Ёнғин оқибатида Damas автомобили тўлиқ ёниб зарарланган.

«Ёнғин оқибатида куйиб, тан жароҳати олган ва вафот этганлар кузатилмади. Ҳозирда содир бўлган ёнғин юзасидан терговга қадар суриштирув ишлари олиб борилмоқда», — дейилади хабарда.

Аввалроқ Андижондаги заправкада автомобил газбаллони портлаб кетиши оқибатида икки киши жароҳат олгани тўғрисида хабар берилганди.

#Наманган #Damas #заправка