Сурияда икки кунлик тўқнашувлар оқибатида мингдан ортиқ одам ҳалок бўлди

Сурияда собиқ президент Башар Асад тарафдорлари ва ҳукумат кучлари ўртасида тўқнашувлар давом этмоқда. Маълумотларга кўра, ҳозирга қадар камида 745 нафар тинч аҳоли ҳалок бўлган.

Фото: AP Photo / Omar Albam

Сурия ғарбидаги Латақия ва Тартус вилоятларида алавийлар томонидан 7 март куни бошланган исён оқибатида мингдан ортиқ инсон ҳалок бўлди, деб хабар беради Associated Press.

Сурия инсон ҳуқуқларини кузатиш обсерваторияси (SOHR) маълумотларига кўра, Суриянинг янги ҳукумати ҳамда ҳокимиятдан ағдарилган собиқ президент Башар Асад тарафдорлари ўртасида икки кундан бери давом этаётган тўқнашувлар давомида камида 745 нафар тинч аҳоли ўлдирилган.

Шунингдек, ҳалок бўлганлар орасида ҳукумат хавфсизлик кучларининг 125 нафар ҳамда Асадга боғлиқ қуролли тузилмаларнинг 148 нафар жангчиси ҳам бор.

SOHR ушбу исённи «Ҳайъат Таҳрир аш-Шом» ҳаракати 2024 йил декабрда Асад режимини ағдарганидан бери Сурияда кузатилган энг қонли воқеа деб атамоқда.

Тўқнашувлар оқибатида ҳалок бўлганлар тўғрисида расмий маълумотлар мавжуд эмас. Шу пайтгача тўқнашувлар асосан локал кўринишда бўлиб, тезда тўхтаган. Агар янги ҳокимият алавийлар қўзғолонини тезда бостира олмаса, бу бошқа жамоалар билан зиддият кучайишига олиб келиши мумкин.

Аввалроқ Сурия марказий ҳукумат кучлари алавийлар қўзғолони бошланган Ўрта Ер денгизи соҳилидаги Латақия ва Тартус вилоятларини назорат остига олгани тўғрисида хабар берилганди. 8 март ҳолатига кўра, ҳукмрон исломий «Ҳайъат Таҳрир аш-Шом» ҳаракати билан алоқадор армия ва жангарилар минтақадаги аҳоли гавжум ҳудудларда рейд ўтказмоқда.

#Сурия #исён #алавийлар

Сурияда қуролли мухолифатнинг 2024 йил 27 ноябридан бошланган кенг кўламли ҳарбий ҳаракатлари орадан 12 кун ўтиб, 8 декабрда Дамашқнинг қулашига олиб келди. Мамлакатда Асадлар сулоласининг 53 йиллик ҳукмронлиги якун топди.