Акрам Афиф — Осиёда йилнинг энг яхши футболчиси!

Бугун, 29 октябр куни Жанубий Корея пойтахти Сеулда Осиё Футбол Конфедерацияси томонидан қитъа футболининг энг яхшиларини тақдирлаш маросими бўлиб ўтмоқда.

Фото: Tribuna.uz

ОФК томонидан йил якунларига бағишланган тақдирлаш маросимида тадбирнинг асосий соврини – йилнинг энг яхши футболчиси соврини Қатар миллий жамоаси ҳамда «Ас-Садд» клуби вингери Акрам Афифга топширилди. У йил бошида ўз мамлакатида ўтган Осиё кубогида миллий жамоаси билан зафар қучиб, қитъада тенгсиз бўлганди.

Афиф Осиё кубоги-2023да 7 ўйинда 8та гол ва 3та ассист қайд этганди. Шунингдек, ЖЧ-2026 саралашида 8 учрашувда 3та голга муаллифлик қилди. Бу мавсумда эса клуби сафида Қатар чемпионатида 8 ўйинда 3та гол қайд этган бўлса, ОЧЛда 3 ўйинда 2та голга муаллифлик қилган.

Афиф «Осиёнинг энг яхши футболчиси» номинациясида Жанубий Корея миллий жамоаси аъзоси Сол Ёнг Ву ва Иордания миллий жамоаси форварди Яздон Ан-Найматни ортда қолдиришга эришди.

#ОФК #Акрам Афиф