Xitoy hukumati hukumat idoralariga bir necha yil ichida xorijiy texnologiyalarni mahalliy yechimlar bilan almashtirishni buyurdi, deb xabar berdi Financial Times 25 mart, dushanba kuni. Davlat idoralari 2027 yilgacha mahalliy texnologiyalarga o‘tishni yakunlashi kerak.
Yangi qoidalar Amerikaning Intel va AMD kompaniyalari chiplaridan shaxsiy kompyuterlar va serverlarda foydalanishdan bosqichma-bosqich voz kechishni anglatadi. Shuningdek, Amerikaning Microsoft kompaniyasining Windows operatsion tizimi va xorijiy kompaniyalar tomonidan ishlab chiqilgan ma’lumotlar bazalaridan bosqichma-bosqich voz kechish ko‘zda tutilgan.
«Xavfsiz» ishlab chiqaruvchilar ro‘yxati faqat Xitoy kompaniyalarini o‘z ichiga oladi
Qoidalar 2023 yil dekabr oyi oxirida Moliya vazirligi, shuningdek, Xitoy Sanoat va axborot texnologiyalari vazirligi tomonidan «AT-ilovalarda innovatsiyalar» dasturida taqdim etilgan, deb yozadi Britaniya nashri. U shahar darajasidan yuqori bo‘lgan davlat idoralari va partiya organlaridan asbob-uskunalar va dasturiy ta’minotni xarid qilishda faqat Xitoy kompaniyalarini o‘z ichiga olgan «ishonchli va xavfsiz» ishlab chiqaruvchilar ro‘yxatiga tayanishni talab qilmoqda.
Hozirgi vaqtda tasdiqlangan texnologiyalar ro‘yxatiga 18 ta protsessor, 6 ta Linux bazasidagi operatsion tizim va 11 ta ma’lumotlar bazasini boshqarish dasturi kiradi. Ularning aksariyati eski modellar, deb yozadi gazeta.
G‘arb kompaniyalari sertifikat olishi dargumon
FT ma’lumotlariga ko‘ra, G‘arb kompaniyalari kerakli sertifikatni olishi dargumon: ular sertifikatlash uchun barcha ishlab chiqish hujjatlari va dasturiy ta’minotning o‘zini Xitoy rasmiylariga topshirishi kerak bo‘ladi. Baholash mezoni Xitoyda dasturiy ta’minotni ishlab chiqish va ishlab chiqarish ulushi ham bo‘ladi.
Xitoyning Intel va AMD mahsulotlaridan foydalanishdan bosh tortishi ikkala kompaniya sotuvlarini sezilarli darajada kamaytiradi, deya qayd etadi FT. Xitoyning Intel daromadidagi ulushi o‘tgan yili 27 foizni, AMD daromadida esa 15 foizni tashkil etdi. Microsoft bosh direktori Bred Smit o‘tgan yili Kongressda Xitoy ulushiga kompaniya daromadining 1,5 foizi to‘g‘ri kelganini aytdi.
