Polsha Xitoyni Rossiyaning Ukrainaga hujumini qoralashga chaqiradi, dedi tashqi ishlar vaziri o‘rinbosari Voysex Gervel Varshavada Xitoy TIVning maxsus vakili Li Xuey bilan uchrashuvda. Polsha TIV tomonidan 19 may, juma kuni chop etilgan press-relizda aytilishicha, Gervel Xitoy “Rossiyaga xalqaro huquq tamoyillariga rioya qilishga qaytish uchun bosim o‘tkazishiga” umid bildirdi.

Bundan tashqari, Voysex Gervel bu urushda tajovuzkor bo‘lgan Rossiya va qurbonga aylangan Ukraina maqomini tenglashtirishga qaratilgan har qanday urinishlarni nomaqbul deb atadi. "Mojarolarni to‘xtatish va tinchlikni tiklash xalqaro huquq tamoyillariga, jumladan, Birlashgan Millatlar Tashkiloti Nizomiga asoslanishi kerak. Biz prezident Zelenskiyning tinchlik rejasini ziddiyatni hal qilish uchun asos sifatida qo‘llab-quvvatlaymiz. Rossiya tomonidan noqonuniy bosib olingan hududlarni qaytarish esa adolatli tinchlikka erishishning yagona maqbul yechimidir", - dedi Polsha tashqi ishlar vaziri o‘rinbosari.

Shuningdek, u Rossiyaning yadro qurolidan foydalanish tahdidini keskin qoraladi. Bu fakt xavfli pretsedent yaratadi va dunyoning boshqa qismlari uchun salbiy oqibatlarga olib kelishi mumkin. “Polsha Xitoyning ushbu qurollar yordamida dunyoni shantaj qilayotgan tajovuzkor davlat Rossiyaga qarshi aniq harakatlariga umid qilmoqda”, - dedi Gervel.

O‘z navbatida, Li Xuey Ukrainadagi vaziyat “hech kimning manfaatlariga javob bermasligini”, ammo Pekinga ko‘ra, “oddiy yechim yo‘qligini” aytdi. Shu bilan birga, Xitoy Tashqi ishlar vazirligining maxsus vakili o‘t ochishni to‘xtatish va tinchlik muzokaralariga qaytish zarurligini ta’kidlab, “Ukrainadagi inqirozni siyosiy yo‘l bilan hal qilish bo‘yicha Xitoyning pozitsiyasi”ni eslatib o‘tdi.