Hindistonning Kerala shtatida loyda botib qolgan 20 yoshli filni qutqarishga butun bir qishloq ahli keldi. Bu haqda Daily Mail nashri xabar bermoqda. 

Filni uning yonidan o‘tib ketgan poyezd hurkitib yuborgan. Fil bundan qochishga tushib, temir yo‘ldan 1,5 km uzoqlikda loyga botib qolgan. Mahalliy aholi uni o‘sha yerda payqab qolgan.

Filni qutqarishga butun qishloq kelgan. Filning boshi va oyoqlariga arqonlar tashlanib, uni traktor yordamida loydan chiqarib olishgan.

“Bu fillar odamlarning yaqinligidan vahimaga tushib, nazoratdan chiqayotgan, Keralada oxirgi 4 oy ichidagi uchinchi shunday holatdir”, deb aytgan tabiat qo‘riqchisi Rajiv Kurup. Uning ta'kidlashicha, bunga shtatda boshlangan festivallar mavsumi ham sabab bo‘lmoqda.