Hindiston hukumati Xitoy bilan chegarada qo‘shimcha 50 ta post qurib, ularning sonini 176dan 226ga qadar ko‘paytirmoqchi. Bu haqda mamlakat ichki ishlar vaziri Rajnatx Singx (Hindistonda chegarachilar IIV tizimiga kiradi – tah.) Hindiston-Xitoy chegarasidan qaytib kelgan harbiy xizmatchilar oldida so‘zlagan nutqida ma'lum qildi.

"Biz o‘zimizning tezkor imkoniyatlarimiz hamda moddiy-texnik bazamizni kuchaytirishga harakat qilmoqdamiz. Yaqinda hukumatning 50ta yangi chegara postini qurish bo‘yicha taklifini oldik, hamda biz buning ustida ishlamoqdamiz", - deya Singxning so‘zlarini keltiradi Times of India gazetasi.

Nashr ma'lumotlariga ko‘ra, Xitoy bilan chegarada (uning masofasi 3488 km.ni tashkil etadi) qo‘shimcha to‘rtta batalon – 4 mingdan ortiq harbiy xizmatchilar joylashtiriladi. Bu qaror har bir post nazorat qiluvchi chegara uchastkalari o‘rtasidagi masofasini qisqartirish, hamda harakatlar muvofiqligini yaxshilashga qaratilgan.