“Asaka” bankining bosh ofisi binosi Madaniyat vazirligiga berildi

O‘zbekiston 19:20 / 18.10.2017 14245

O‘zbekiston Respublikasi prezidenti 2017 yil 18 oktabrda “O‘zbekiston Respublikasi Madaniyat vazirligining moddiy-texnik bazasini mustahkamlash to‘g‘risida”gi qarorni imzoladi.

Hujjat O‘zbekiston Respublikasi Madaniyat vazirligining moddiy-texnik bazasini mustahkamlash, uning samarali faoliyat ko‘rsatishini ta'minlash, madaniyat va san'at sohasi vakillari uchun har tomonlama qulay sharoit yaratish maqsadida imzolandi.

Qaror bilan O‘zbekiston Respublikasi Madaniyat vazirligi, Xususiylashtirilgan korxonalarga ko‘maklashish va raqobatni rivojlantirish davlat qo‘mitasi, Toshkent shahar hokimligining Toshkent shahri, Taras Shevchenko ko‘chasi, 1-uy manzilda joylashgan bino va inshootlarni tegishli hududi bilan birgalikda operativ boshqarish huquqi asosida O‘zbekiston Respublikasi Madaniyat vazirligiga bepul berish to‘g‘risidagi takliflari ma'qullandi.

Toshkent shahri hokimligi obektni bir oy muddatda belgilangan tartibda topshirishi, O‘zbekiston Respublikasi Madaniyat vazirligi qabul qilib olishi hamda obektni saqlash va undan samarali foydalanish bo‘yicha zarur chora-tadbirlar ko‘rishi belgilab qo‘yildi.

Toshkent shahar hokimligi bir oy muddatda “Asaka” aksiyadorlik tijorat bankini banklarga qo‘yiladigan talablarga javob beradigan binoga joylashtiradi.

O‘zbekiston Respublikasi Prezidentining “O‘zbekiston Respublikasi Madaniyat vazirligi faoliyatini tashkil etish to‘g‘risida” 2017 yil 15 fevraldagi PQ-2778-son qarori matnining 9-bandidagi “Mustaqillik maydoni, 5-uyda” so‘zlari “Taras Shevchenko ko‘chasi, 1-uyda” so‘zlari bilan almashtiriladi.

O‘zbekiston Respublikasi Prezidentining “O‘zbekiston Respublikasi Tashqi iqtisodiy aloqalar, investitsiyalar va savdo vazirligining tuzilmasini maqbullashtirish va uning faoliyati samaradorligini yanada oshirish chora-tadbirlari to‘g‘risida” 2015 yil 31 dekabrdagi PQ-2463-son qarorining 8-bandi hamda unga 5-ilova o‘z kuchini yo‘qotgan deb hisoblanadi.

Mazkur qarorning ijrosini nazorat qilish O‘zbekiston Respublikasining Bosh vaziri A.N.Aripov, Toshkent shahri hokimi R.J.Usmonov va O‘zbekiston Respublikasi Madaniyat vaziri B.S.Sayfullayev zimmasiga yuklandi.

Ko‘proq yangiliklar: