Венесуэлада Мадуронинг таниқли компаниядан пул олганига доир маълумотлар ошкор қилинди

Жаҳон 13 Октябрь 2017 3493

Венесуэла бош прокурори лавозимидан четлаштирилган Луиса Ортега Диас ўз сайтида  Odebrecht қурилиш компанияси раҳбарининг кўрсатмаларини эълон қилди. У мамлакатнинг ҳозирги президенти Николас Мадуронинг сайловолди кампанияси аввалида 35 млн доллар олганини айтган. 

Гап Уго Чавеснинг ўлимидан сўнг бўлиб ўтган 2013 йилги сайловлар ҳақида бормоқда. Ўшанда, Чавес издоши Мадуро мураккаб курашда мухолифатдан сиёсий рақиби Энрике Каприлесни бир фоиздан кўпроқ фарқ билан ортда қолдирган эди. 

Компания раҳбари Эузенандо Празереш ди Асеведанинг кўрсатмалари 2016 йил декабрь ойида, унинг Бразилия прокуратурасида расман сўроқ қилинган вақтида ёзиб олинган. 

"Мени Мадуронинг вакили, ўзим бир неча йил таниган венесуэлалик Америко Мата топиб, Мадуро кампаниясига бизнесимидан кўмак беришни сўради. У 50 млн доллар сўради, аммо мен 35 млн доллар тўлашга рози бўлдим", — деган Празереш овозли ёзувда.

Унинг сўзларига кўра, бунинг эвазига Мадуро ғалаба қозонгудек бўлса, компаниянинг Венесуэладаги лойиҳаларини энг аҳамиятли деб баҳолашда давом этишини сўраган. 

"Жаноб Америко менга кафолат бериб айтдики, агар Мадуро ғалаба қозонса, у Odebrecht лойиҳаларига устунлик беради", — деб қайд этган Празереш. Венесуэладаги Odebrecht лойиҳалари аввалги давлат раҳбари вақтида бошланган эди.