Буюк Британияда "ақлли зебра" синовдан ўтказилди

Технология 10 Октябрь 2017 3933

Пиёдалар ўтиш йўлаги ёки оддий халқ тилида "зебра" ҳар бир инсонга таниш. Бу йўл ҳаракати иштирокчиларига қатнов қисмининг қаеридан кесиб ўтиш мумкинлигини кўрсатувчи чизиқлардир.

Ақл кириб бораётган техникаларнинг ҳозирги даврида, "Ақлли" автомобиллар, светофорлар, йўл белгилари пайдо бўлди. Пиёдаларнинг қўли эса ақлли гаджетлар билан тўлди. Аммо "зебра" унчалик ақлли эмасди.

Бу камчиликни бартараф қилишга Англиянинг Direct Line суғурта компанияси бел боғлади, деб хабар бермоқда Hi-news.ru сайти.

У дастлабки "ақлли" ўтиш йўлакларини ихтиро қилди. Direct Line инженерларининг бу кашфиёти, йўлларда ҳаракат хавфсизлигини ҳақиқатда таъминлашга қодир бўлган технологик ускуналардан биридир.

Ақлли зебра пиёданинг ҳаракатини илғаб оладиган ва ҳайдовчиларни хавфдан огоҳлантирадиган сезгир сенсорларга эга. Бундан ташқари, у тескари томонга ҳам ишлайди, яъни пиёдани яқинлашиб келаётган транспорт воситасидан огоҳлантиради.

Фото: PA

Ёруғлик диодига эга пиёдалар йўлаги бир неча режимда ишлайди. Йўл очиқ бўлган ҳолатда, яъни унда автобиллар ва велосипедчилар йўқ бўлса, автоматик тарзда яшил рангга киради.

Зебранинг дастлабки узунлиги 22 метрни ташкил қилади. Агар йўлни кесиб ўтувчи одамлар сони кўп бўлса, у энига қараб ўсади.

Тизим куннинг қоронғи қисмида пиёдаларни ёритиб, ҳайдовчиларни огоҳлантира олади. Зебрага транспорт воситаси яқинлашганида, йўлак қизил тусга киради.

Бундан ташқари, агар инсон ҳаракат қоидаларига зид равишда йўлни кесиб ўтмоқчи бўлса, унинг ранги яшилдан қизилга ўзгаради. Масалан, у зебра ҳудудидан чиқиб кетса, тизим ҳайдовчини хавфдан огоҳлантиради.