Amazon қиймати 1 триллион доллардан ошадиган илк компания бўлиши айтилди

Технология 10 Октябрь 2017 3637

Amazon (NASDAQ: AMZN) компанияси бозор қиймати 1 триллион доллардан ошадиган илк компания бўлади, деб ҳисобламоқда Нью-Йоркдаги Штерн бизнес мактаби профессори ва яқинда чоп этилган "Тўртлик: Amazon, Apple, Facebook ва Google ДНКси сири" номли китоб муаллифи Скотт Гэллоуэй. У бу ҳақда The Street нашрига берган интервьюсида айтиб ўтди.

Ҳозирда Amazon қиймати дунёнинг энг қиммат компанияси Apple қийматининг тахминан 60 фоизига тенг, яъни бу кўрсаткичлар мос равишда 476 млрд ва 805 млрд долларни ташкил қилмоқда.  Apple анъанавий тарзда қиймати 1 трлн доллардан ошадиган илк компания бўлишга номзод ҳисобланади. 

Гэллоуэйнинг айтишича, юқорида тилга олинган 4 та энг йирик технологик компания муҳим бозорларда рақобат қилаётган бир вақтда Amazon жуда олдинлаб кетади.

"Агар Amazon қолган 3 та компания билан қандай рақобатлашаётганига назар ташласангиз, у бу компаниялар билан тўқнаш келаётган барча жабҳаларда уларни мағлуб этмоқда", деб ҳисобламоқда олим. 

Гэллоуэй Amazon 13,7 млрд долларга Whole Foods Market озиқ-овқат дўконлари тармоғини сотиб олганини эслатиб ўтди. Бу харид охирги 20 йил ичида ритейл-бизнесда амалга оширилган энг йирик битим бўлди. Олимнинг фикрича, Amazon анъанавий савдонинг турли тармоқларида ўз иштирокини тажовузкор руҳда оширишни давом эттирмоқда ва интернетда савдолар ҳажмини ошириш учун офлайндаги иштирокини оширмоқда. Олимнинг таъкидлашича, компаниянинг кейинги "нишони" Nordstrom универмаглари тармоғи бўлиши мумкин.