Xo‘jalik yurituvchi sub'yektlar tomonidan chet el valyutasini sotib olish tartibi to‘g‘risida ma'lumot berildi

Iqtisodiyot 09:11 / 19.09.2017 32038

Yuridik shaxslar va yuridik shaxs tashkil etmasdan faoliyat yurituvchi yakka tartibdagi tadbirkorlar tomonidan chet el valyutasini sotib olish tartibi to‘g‘risida murojaatlar kelib tushayotganligi munosabati bilan, O‘zbekiston Respublikasi Markaziy banki quyidagilarni ma'lum qildi:

O‘zbekiston Respublikasi Prezidentining 2017 yil 2 sentabrdagi «Valyuta siyosatini liberallashtirish bo‘yicha birinchi navbatdagi chora-tadbirlar to‘g‘risida»gi PF-5177-sonli Farmoniga ko‘ra 2017 yil 5 sentabrdan:

O‘zbekiston Respublikasining yuridik shaxslari joriy xalqaro operatsiyalar (tovar, ish va xizmatlar importi, foyda repatriatsiyasi, kreditlarni qaytarish, xizmat safari xarajatlarini to‘lash va boshqa savdo xarakteriga ega bo‘lmagan o‘tkazmalar) bo‘yicha to‘lovlarni amalga oshirish uchun tijorat banklarida chet el valyutasini cheklovsiz sotib olishlari mumkin;

iste'mol tovarlari importi bilan shug‘ullanuvchi yuridik shaxs tashkil etmasdan faoliyat ko‘rsatuvchi yakka tartibdagi tadbirkorlarga chet el valyutasini jismoniy shaxslar uchun o‘rnatilgan tartibda, banklardagi hisobvaraqlar orqali sotib olishga ruxsat beriladi (bunda sotib olingan xorijiy valyuta mijozning hisob raqamiga o‘tkazib beriladi va mijozga xalqaro to‘lov kartasi taqdim etiladi).

Shu munosabat bilan, yuridik shaxslar hamda yakka tartibdagi tadbirkorlar chet el valyutasini cheklanmagan miqdorda sotib olishlari va o‘z ixtiyorlariga ko‘ra sotib olingan mablag‘larni joriy xalqaro operatsiyalar (tovar va xizmatlar importi va b.) bo‘yicha to‘lovlarni amalga oshirish uchun yo‘naltirishlari mumkin.

Bunda sotib olinayotgan chet el valyutasi uchun to‘lov yakka tartibdagi tadbirkorlar tomonidan quyidagi mablag‘lar hisobidan amalga oshirilishi mumkin:

- yakka tartibdagi tadbirkorning savdo tushumi;
- bankka topshirilgan naqd mablag‘lar.

Yakka tartibdagi tadbirkorlar sotib olingan valyuta mablag‘larini quyidagi yo‘llar bilan cheklovlarsiz ishlatishlari mumkin:

- mamlakatdan tashqarida xalqaro to‘lov kartalariorqali, shu jumladan bankomatlardan naqd xorijiy valyutani yechib olish yo‘li bilan;
- tasdiqlovchi hujjatlar asosida (invoys yoki to‘lov uchun hisob yoxud import shartnomasi va b.) tovarlar va xizmatlar importi uchun to‘lovni bank o‘tkazmasi orqali amalga oshirish.

Tadbirkorlik sub'yektlari diqqatiga. Tijorat banklarining ro‘yxati va “ishonch telefonlari” raqamlari axborotga ilova qilingan. Xorijiy valyutani sotib olish bilan bog‘liq savollar yoki muammolar vujudga kelgan hollarda ko‘rsatilgan raqamlar orqali tijorat banklariga yoki Markaziy bankka murojaat qilish mumkin.

 

Ko‘proq yangiliklar: