Prezident paxta hosilini tez muddatlarda yig‘ib olishga qaratilgan qarorini imzoladi

O‘zbekiston 22:37 / 21.08.2017 63264

21 avgustda O‘zbekiston Respublikasi Prezidenti Shavkat Mirziyoyev "2017 yilda g‘o‘za defoliatsiyasini o‘z vaqtida va samarali o‘tkazish bo‘yicha kompleks tashkiliy chora-tadbirlar to‘g‘risida"gi 3229-sonli qarorni imzoladi. Bu haqida Prezident matbuot xizmati xabar berdi. 

G‘o‘zani sifatli defoliatsiya qilish, paxta hosilini erta muddatlarda yig‘ishtirib olish va paxta terish mashinalaridan samarali foydalanish uchun dalalarni o‘z vaqtida tayyorlash maqsadida:

1. O‘zbekiston Respublikasi Qishloq va suv xo‘jaligi vazirligining Qoraqalpog‘iston Respublikasi Vazirlar Kengashi va viloyatlar hokimliklari bilan kelishilgan 2017 yilda g‘o‘za defoliatsiya qilinadigan maydonlar va uning maqbul muddatlari to‘g‘risidagi 1-ilovaga muvofiq takliflari qabul qilinsin.

2. Qoraqalpog‘iston Respublikasi Vazirlar Kengashi, viloyatlar va tumanlar hokimliklari chigit ekish muddatlari, navi va g‘o‘zaning yetilish davri, joylardagi ob-havo-iqlim sharoitlarini, ko‘sak ochilishi sur'atlarini hisobga olgan holda tumanlar va fermer xo‘jaliklari bo‘yicha g‘o‘zani 1-ilovada belgilangan maydonlar va muddatlarda defoliatsiya o‘tkazish yuzasidan aniq chora-tadbirlar ko‘rsinlar.

G‘o‘za defoliatsiyasining belgilangan muddatlarda va sifatli o‘tkazilishi hamda defoliantlarni ishlatish normalari va tavsiyalariga qat'iy rioya etilishi uchun shaxsiy javobgarlik Qoraqalpog‘iston Respublikasi Vazirlar Kengashi Raisi, viloyatlar va tumanlar hokimlari, “O‘zagrokimyohimoya” AJ rahbarlari zimmasiga yuklansin.

3. O‘zbekiston Respublikasi Bosh vazirining o‘rinbosari - Qishloq va suv xo‘jaligi vaziri Z.T.Mirzayev:

besh kun muddatda defoliatsiyaga tayyorgarlik ko‘rish va uni o‘tkazish ishlarini muvofiqlashtiruvchi respublika ekspert ishchi komissiyasini, shuningdek Qoraqalpog‘iston Respublikasida, viloyatlar va tumanlarda ekspert ishchi komissiyalarni shakllantirsin, ularning tarkibiga O‘zbekiston Respublikasi Qishloq va suv xo‘jaligi vazirligi, “O‘zpaxtasanoat”AJ, O‘zbekiston “Sifat” markazi, “O‘zagrokimyohimoya” AJ mutaxassislarini kiritib, ularning zimmasiga g‘o‘za defoliatsiyasi ishlari tashkil etilishi va kompleks chora-tadbirlar amalga oshirilishi yuzasidan tizimli nazoratni ta'minlashga doir aniq vazifalar yuklasin;

defoliatsiya ishlari o‘tkazilishi yuzasidan qat'iy va doimiy nazoratni ta'minlasin hamda agrotexnika tadbirlarini o‘tkazish borasida belgilangan muddatlar va me'yorlarga rioya etishni ta'minlamayotgan mansabdor shaxslarga nisbatan qat'iy javobgarlik choralarini ko‘rsin.

4. Qoraqalpog‘iston Respublikasi Vazirlar Kengashi, viloyatlar hokimliklari, O‘zbekiston Respublikasi Qishloq va suv xo‘jaligi vazirligi, “O‘zagrokimyohimoya” AJ, “O‘zagroservis” AJ joriy yilning 31 avgustigacha bo‘lgan muddatda:

fermer xo‘jaliklari bo‘yicha defoliatsiya o‘tkaziladigan maydonlarni aniqlasinlar va har bir tumanni defoliantlar bilan ta'minlash hamda ularni alohida ajratilgan joylarda tayyorlash uchun tegishli shart-sharoitlar yaratish, defoliatsiyani tashkil etish va maqbul muddatlarda o‘tkazish tadbirlarini - “yo‘l xarita”larini ishlab chiqsinlar. G‘o‘za defoliatsiya qilinadigan maydonlarni belgilashda urug‘lik go‘za maydonlari hisobga olinmasin;

yerda ishlatiladigan texnikalardan to‘liq foydalanishni ta'minlashga e'tibor qaratib, defoliatsiyani yerda bajariladigan usullar bilan o‘tkazish uchun texnik vositalar va apparatlar tayyorlanishini tugallasinlar;

g‘o‘za maydonchalarini tayyorlashni tugallasinlar va ularda defoliantlar eritmasini tayyorlash uchun zarur idishlar va boshqa texnik vositalar mavjud bo‘lishini ta'minlasinlar.

5. “O‘zbekiston havo yo‘llari” milliy aviakompaniyasi “O‘zagrokimyohimoya” AJ buyurtmanomalari bo‘yicha g‘o‘za defoliatsiyasini o‘tkazish uchun samolyotlar ajratsin va ularning 2-ilovaga muvofiq 2017 yil 31 avgustgacha mintaqalarga yetib borishini ta'minlasin.

Viloyatlar hokimliklari joriy yilning 31 avgustiga qadar maxsus aerodromlar tayyorlanishini, shu jumladan uchuvchilar uchun zarur maishiy sharoitlar yaratilishini tugallasinlar.

6. O‘zbekiston Respublikasi Bosh prokuraturasi defoliatsiya o‘tkazilishi yuzasidan qat'iy nazorat o‘rnatsin hamda defoliantlarni qo‘llash me'yorlariga rioya etilishi va defoliatsiyaning belgilangan muddatlarda o‘tkazilishiga alohida e'tibor qaratsin.

7. “O‘zneftmahsulot” AJ yonilg‘i-moylash materiallarining zarur zaxirasini yaratsin hamda purkagichlar va samolyotlar ishlarini ta'minlash uchun g‘o‘zani defoliatsiya qilish davrida ularning belgilangan tartibda uzluksiz yetkazib berilishini tashkil etsin.

8. O‘zbekiston Respublikasi Vazirlar Mahkamasi huzuridagi Davlat xaridi uchun qishloq xo‘jaligi mahsulotlarini yetishtirish va qishloq xo‘jaligini texnika bilan jihozlashni maqsadli moliyalashtirish jamg‘armasi bir hafta muddatda, asoslangan buyurtmanomalarga binoan tijorat banklariga fermer xo‘jaliklari uchun g‘o‘za defoliatsiyasini o‘tkazishga zarur kredit mablag‘larini, kelgusida ulardan defoliantlar xarid qilish hamda “O‘zagrokimyohimoya” AJ va «SAR» aviakompaniyasi xizmatlariga haq to‘lash uchun foydalanish maqsadida, belgilangan tartibda ajratsin.

9. Mazkur qarorning ijrosini nazorat qilish O‘zbekiston Respublikasi Bosh vazirining o‘rinbosari - Qishloq va suv xo‘jaligi vaziri Z.T.Mirzayev, Qoraqalpog‘iston Respublikasi Vazirlar Kengashi Raisi, viloyatlar va tumanlar hokimlari, “O‘zagrokimyohimoya” AJ raisi U.A.Axunov zimmasiga yuklansin.

Ko‘proq yangiliklar: