Toshkent viloyati ichki ishlar organlari Zangiota tumanida 3 kishini qasddan o‘ldirishda gumon qilinayotgan M.Musayevni qo‘lga oldi. Bu haqda Uznews.uz xabar bermoqda. Mazkur xabarni viloyat IIB mulozimi ham Kun.Uz tahririyatiga tasdiqladi. 

2017 yil 14 avgustda muqaddam sudlangan 38 yoshli erkak «Turobobod» mahallasi Turkiston ko‘chasida istiqomat qiluvchi 79 yoshli M.K.ning uyiga mehmon bo‘lgan. Uy egasi notanish kishining tunashiga ruxsat bergan. Yarim tunda M.Musayev uy egasi M.K., uning 66 yoshli nogiron singlisi Sh.K. va 50 yoshli qizi Sh.A.ni bo‘g‘izlab, o‘ldirgan. Shundan so‘ng, uydagi oltin kabi qimmatbaho buyumlarni olib yashiringan. 

Jinoyatni fosh etishga ushbu mahalla ko‘chalariga joylashtirilgan tashqi kuzatuv kameralari qayd etgan videoyozuvlar yordam bergan. 

Sud tomonidan M.Musayevga nisbatan qamoqqa olish ehtiyot chorasi ko‘rilgan. 

Ayni vaqtda ushbu ish bo‘yicha dastlabki tergov harakatlarini viloyat prokuraturasi olib bormoqda.