Макгрегор Мэйуэзер билан жангдан кейин ҳам бокс билан шуғулланмоқчи

Спорт 13 Август 2017 14336

Мутлақ жангчилик чемпионати (UFC) чемпиони Конор Макгрегор америкалик боксчи Флойд Мэйуэзер билан ўтказадиган бокс жангидан кейин ҳам боксчилик фаолиятини давом эттирмоқчи. Бу ҳақда Boxingscene портали хабар бермоқда. 

Макгрегор ва Мэйуэзер ўртасидаги жанг 26 август куни Лас-Вегасда бўлиб ўтади.

“Менга бокс спорти жуда ёқади, у ҳамиша қалбим ардоғида бўлган. Келажакда мен бокс жангларида, шунингдек аралаш яккакурашда ҳам иштирок этишни режалаштирмоқдаман”, деб айтган жангчи.

Ирландиялик спортчи ҳисобида 24 та жангдан 21 та ғалаба, 3 та мағлубият бор. У UFC’даги илк чемпионлик унвонини 2015 йилда қўлга киритган. Конор 2016 йил 20 августда Нейт Диасга қарши жанги учун ташкилот тарихидаги рекорд гонорар – 3 млн долларга яқин пул олган.

40 ёшли Мэйуэзер эса барча даврларнинг энг катта ҳақ олувчи боксчиси ҳисобланади. У профессионал рингда 49 та ғалабани қўлга киритиб, бирор марта ютқазмаган. У 5 та вазн тоифасида жаҳон чемпиони бўлган. У шунингдек 1996 йилги Олимпия ўйинларининг бронза медали соҳиби ҳисобланади. Флойд 2015 йил 2 майда яна бир супербоксчи, филиппинлик Мэнни Пакьяога қарши жанги учун бокс тарихидаги энг катта гонорар – 210 млн доллар олган.