Prezidentning «Aholini dori vositalari va tibbiyot buyumlari bilan ta'minlash tizimini takomillashtirish bo‘yicha qo‘shimcha chora-tadbirlar to‘g‘risida»gi qarori bilan dori vositalari va tibbiyot buyumlarini xarid qilish, iste'molchilarga tovar cheki berish jarayonlari yanada takomillashtirildi. Bu haqda Kun.uz’ga Sog‘liqni saqlash vazirligi axborot xizmati xabar berdi.
– Ayrim dorixonalarda uskuna nosozligi yoki boshqa biror sabab tufayli tovar cheki berilmasligi holatlari qayd etilayotgan edi. Bu esa dori vositalarining cheklangan narxlarda sotilishi va sifati ustidan iste'molchi nazoratining susayishiga olib kelayotgandi, – deydi Sog‘liqni saqlash vazirligi Dori vositalari va tibbiy texnika sifatini nazorat qilish Bosh boshqarmasi bo‘lim boshlig‘i Muhabbat Ibragimova. – Davlat rahbarining mazkur qarorida dori vositalari va tibbiyot buyumlarini chakana sotishda foydalaniladigan tovar cheklari kitobi shaklini tasdiqlash vazifasi belgilandi. Ushbu kitob qat'iy hisobi yuritiladigan blank hisoblanadi va undan tovar cheklarini berish bo‘yicha asbob-uskunalar mavjud bo‘lmagan yoki nosoz bo‘lgan yoxud elektr energiyasi vaqtincha o‘chirilgan hollardagina foydalaniladi. Ushbu blankda ham tovar chekida qayd etiluvchi ma'lumotlar to‘liq aks etadi. Ya'ni unda:
• Dori vositasi yoki tibbiyot buyumining nomi;
• Identifikatsiya ma'lumotlari (nomi, dozasi, qadoqlash, miqdori);
• Ularni beruvchi shaxsga oid ma'lumotlar;
• Berish sanasi;
• Narxi bo‘ladi.
Tovar cheklarining ahamiyatli tomoni shundaki, agar iste'molchida tibbiy preparatning narxi oshirilganligi xususida shubha yuzaga kelsa, uni aniqlash tovar cheklari orqali amalga oshiriladi. Ilgari faqat kassa cheki berilar va unda dori vositalarining nomi va har birining narxi qayd etilmasdi. Endilikda xaridorning o‘zi ham jamoatchilik nazoratini amalga oshirishi va dori vositalarining cheklangan narxlarda sotilishini nazorat qilib borishi mumkin. Buning uchun dori vositalari va tibbiy buyumlar xarid qilinganda, albatta, kassa cheki bilan birga, tovar cheklari yoki uning muqobili bo‘lgan tovar cheklari kitobi blankasi to‘ldirib berilishini so‘rang.
