O‘zbekiston mobil operatorlari 2018 yilning 1 iyulidan boshlab milliy valyutada tariflar o‘rnatadi va hisob-kitoblarni amalga oshiradi. Mobil operatorlar faoliyatining yangi qoidalari O‘zbekiston Respublikasi normativ huquqiy hujjatlarning muhokamasi portalida e'lon qilindi.

Tariflarni o‘rnatishda va ko‘rsatilayotgan mobil aloqa xizmatlari uchun hisob-kitoblarni amalga oshirishda, xorijiy valyutadan, shuningdek, xorijiy valyutadagi to‘lov hujjatlaridan foydalanishga qonun hujjatlari bilan belgilangan hollarda, tartib va shartlarda yo‘l qo‘yiladi. 2018 yil 1 iyuldan tariflarni o‘rnatish va ko‘rsatilayotgan mobil aloqa xizmatlari uchun hisob-kitoblarni amalga oshirish O‘zbekiston Respublikasi milliy valyutasida amalga oshiriladi.

Yangi qoidalar bilan shartnoma bekor qilinganida pul mablag‘larini qaytarish imkoniyati ham nazarda tutilgan. Operator abonentga ishlatilmagan mablag‘lar qoldig‘ini 15 kun davomida qaytarib berishga majbur.

Eslatib o‘tamiz, O‘zbekiston Axborot texnologiyalari va kommunikatsiyalarini rivojlantirish vaziri o‘rinbosari 2017 yil oxiriga qadar mobil aloqa operatorlari va internet-provayderlar xizmatlarini milliy valyutada narxlashga o‘tkazish bo‘yicha qaror ishlab chiqilishi haqida ma'lum qilgandi. «O‘tish jarayonining o‘zi katta mablag‘larni talab qiladi, bu arzonga tushadigan tadbir emas. Biroq, Harakatlar strategiyasiga ko‘ra, hamma milliy valyutada narxlashga o‘tadi: mobil operatorlar ham, internet-provayderlar ham. Qaror shu yil oxirigacha ishlab chiqiladi va kelgusi yildan amalga oshirila boshlaydi», — deya qayd etgan Umidjon A'lamov.