Газ омборлари қуввати оширилади

Иқтисодиёт 19 Июнь 2017 11826

Ўзбекистонда газ омборлари қуввати бир неча баробарга  оширилади.  Халқаро Пресс-клуб йиғилишида "Ўзбекнефтгаз" миллий холдинг компанияси вакилларининг маълум қилишича, бугунги кунда мутахассислар олдига Газли ва Ҳожиобод газ омборларининг қувватини ошириш вазифаси қўйилган. 

Омборлар қувватининг оширилиши кузги-қишки мавсумда узлуксиз газ етказиб бериш ҳамда аҳолини газ билан таъминлаш тизимини такомиллаштиришга йўналтирилган. 

Мутахассисларнинг таъкидлашича, Газли омборининг бугунги кундаги газ ишлаб чиқариш қуввати 3 миллиард кубометрга тенг. Холдинг хорижий ҳамкорлари билан биргаликда омбор қувватини 10 миллиард кубометр газгача оширишни режалаштирмоқда. 

Бундан ташқари, мустақиллик йилларида Фарғона вилоятида қурилган Ҳожиобод газ омбори қуввати ҳам оширилади.

Ўзбекистон аҳолига газ етказиб бериш комплексини такомиллаштирмоқда. Бугунга қадар 68,6 километр газ қувурлари капитал таъмирланди, 171,9 километри эса қайта таъмирланди.