AQShning harbiy kemasi Lake Champlain Yapon dengizidagi mashg‘ulotlar vaqtida Janubiy Koreyaning baliq tutuvchi kemasiga urilib ketdi. Bu haqda Janubiy Koreya mudofaa vazirligiga iqtibos keltirgan holda "Ryonxap" axborot agentligi xabar bermoqda.
"AQSh kreyseri Lake Champlain va Janubiy Koreyaning "Nam'yan-502" baliq tutuvchi kemasi to‘qnashuvi Ullindo orolidan janubga tomon 56 mil uzoqlikda yuz berdi", deb ma'lum qildi axborot agentligi manbasi.
Ta'kidlanishicha, to‘qnashuv kemalardan birortasiga jiddiy shikast yetkazmagan va ular harakatni davom ettirishgan. Shu bilan birga AQSh harbiy-dengiz kuchlari va Janubiy Koreya sohilbo‘yi qo‘riqlash xizmati favqulodda vaziyat sababini aniqlashtirishlari va yetkazilgan ziyonni baholashlari kerak bo‘ladi.
