2017 yil 29 mart kuni Oliy va o‘rta maxsus ta'lim vaziri R.Qosimovning Koreya Respublikasi Bosh vazirining o‘rinbosari, ta'lim vaziri Li Jun Sik rahbarligidagi delegatsiya bilan uchrashuvi bo‘lib o‘tdi.

Uchrashuv chog‘ida Li Jun Sik Koreya Respublikasi bir vaqtlar jahondagi iqtisodiy jihatdan rivojlanmagan mamlakatlar qatorida turganini qayd etib o‘tdi. Keyinchalik Koreya Respublikasining iqtisodiy taraqqiyoti ta'lim va fan rivojiga asoslangan edi. O‘zbekiston ham shunday yo‘l tutdiki, bu yo‘l ham ijobiy natijalarga olib kelishini ishonch bilan aytish mumkinligini ta'kidlab o‘tdi Bosh vazir o‘rinbosari.

Uchrashuvda oliy ta'lim sohasidagi hamkorlik aloqalarini kengaytirish bilan bog‘liq masalalar muhokama etildi. Ma'lumki, 2014 yildan buyon Toshkent shahridagi Inxa universiteti o‘z faoliyatini yo‘lga qo‘ygan bo‘lib, u yerda axborot-kommunikatsiya texnologiyalari sohasi uchun yetuk kadrlar tayyorlanmoqda.

Tomonlar qayd etishdiki, oliy ta'lim sohasidagi hamkorlikni milliy tillarni – Koreya Respublikasida o‘zbek tilini, O‘zbekistonda koreys tilini o‘rganish masalasidan xoli tasavvur qilib bo‘lmaydi. Bir-birimizning tilimizni o‘rganish mamlakatlar o‘rtasidagi nafaqat madaniy-gumanitar sohada, balki savdo-iqtisodiy hamkorlik aloqalarining ham rivojlanishida asosiy omili hisoblanadi.

Ma'lumki, Xankuk xorijiy tillar universitetida, Xanshin universitetida va Pusan universitetida o‘zbek tili o‘rganiladi. O‘zbek tilini o‘rganayotgan Koreya Respublikasi fuqarolari stajirovka o‘tish uchun muntazam ravishda O‘zbekistonga tashrif buyurishadi. Bu sohadagi hamkorlikni yanada rivojlantirish maqsadga muvofiq.   

Tadbirda vazir o‘rinbosari M.Karimov, xalqaro aloqalar bo‘limi boshlig‘i Yo.Ergashev, Toshkent davlat sharqshunoslik instituti, Toshkent to‘qimachilik va yengil sanoati instituti, Toshkent shahridagi Inxa universiteti rektorlari ham ishtirok etishdi.