14 mart kuni Toshkent shahar hokimligida bo‘lib o‘tgan matbuot anjumanida shahardagi maktablar va o‘rta maxsus ta'lim muassasalaridagi o‘quvchilar davomati va o‘quv jarayoni muhokama qilindi.
Unda shahar hokimligi, shahar prokuraturasi, IIBB, Xotin-qizlar qo‘mitasi, Xalq ta'limi boshqarmasi, O‘rta maxsus, kasb-hunar ta'limi boshqarmasi, "Mahalla" xayriya jamoat fondi, "Kamolot" YoIH shahar kengashi hamkorligida qabul qilingan "2016-2017 yilgi o‘quv yilida umumta'lim maktablari, kasb-hunar kollejlari va akademik litseylarda o‘quvchilar davomatini to‘liq ta'minlash, 9-sinf bitiruvchilarini o‘rta maxsus, kasb-hunar ta'limi muassasalariga o‘qishga qamrab olishni amalga oshirishga qaratilgan qo‘shimcha chora-tadbirlar to‘g‘risida"gi qo‘shma qarorning mazmun-mohiyati tushuntirib o‘tildi.
Ma'lum bo‘lishicha, O‘zbekistondagi maktablarda 1 mart kunidan boshlab "Kamolot" tarbiyachisi lavozimi paydo bo‘lgan. Bunday tarbiyachining asosiy vazifasi o‘quvchilarga darslarni o‘zlashtirishda yordam ko‘rsatish hamda ularning dars qoldirmasligini ta'minlash bo‘ladi.
"Kamolot" tarbiyachilarining vazifalari quyidagilardan iborat:
- Yetakchilar maktab ma'muriyati bilan birga 10 kun ichida doimiy ravishda darslarni qoldirayotgan o‘quvchi va talabalar ro‘yxatini tuzishadi;
- bir hafta davomida barcha ta'lim muassasalaridagi real davomatni aniqlaydi;
- mahalla profilaktika inspektorlarini ta'lim muassasalariga biriktiradi.
Profilaktika inspektorlari sababsiz dars qoldirayotgan, ta'lim muassasasi ichki tartiblariga rioya qilmaydigan o‘quvchilarning ota-onalari bilan ishlab, farzandlari tarbiyasiga e'tiborsiz bo‘lgan kishilarga nisbatan tegishli choralar ko‘rishadi.