Pan Gi Mun: Zo‘ravonlik va ziddiyatlar dunyoga 13 trillion dollardan qimmatga tushdi

Jahon 10:21 / 22.09.2016 4173

Dunyo hamjamiyati 2015 yilda zo‘ravonlik va ziddiyatlar tufayli taxminan 13,6 trillion dollarga tushdi. Bu haqida BMT bosh kotibi Pan Gi Mun chorshanba kuni  jahon tashkilotining Tinchlik fondini qo‘llab-quvvatlovchi konferensiyada ma'lum qildi.

"Iqlimning o‘zgarishi, iqtisodiy inqirozlar va moliyaviy yo‘qotishlar, o‘sib borayotgan tengsizlik hamda yoshlar orasidagi xavf darajasiga yetayotgan ishsizlik ziddiyatlarga sabab bo‘ladi va insonlarga juda kuchli ta'sir ko‘rsatadi", - dedi Pan Gi Mun. - Uzoq tanaffusdan so‘ng ziddiyatlar soni ko‘paya boshladi. Davlatlararo urushlar kamaygan bo‘lsa-da, mamlakatlarda ichki to‘qnashuvlar yuzaga kelmoqda, ko‘p holatlarda ularga tashqi kuchlar va nodavlat sub'yektlar jalb qilinmoqda". 

"Ekspertlarning baholariga ko‘ra, 2015 yilda zo‘ravonlik va ziddiyatlar dunyoga taxminan 13,6 trillion dollarga tushdi, - dedi bosh kotib. - Bu sayyoramizning har bir kishisi boshiga 1,8 ming dollardan to‘g‘ri keladi". "Faqatgina 2015 yilning o‘zida dunyo hamjamiyati tinchlikparvar operatsiyalar va ziddiyatlardan jabr ko‘rgan kishilar hamda qochqinlarga insonparvarlik yordami uchun 34 milliard dollar sarfladi", - deya ta'kidladi BMTning ma'muriy rahbari. 

Pan Gi Mun insonparvarlik ehtiyojlariga o‘z vaqtida qilingan xarjlar foijiali voqealarning oldini olishi mumkinligini ta'kidladi. Shu munosabat bilan bosh kotib davlatlarni BMT Tinchlik fondiga ko‘proq pul vositalari o‘tkazishga chaqirdi. "U dunyo bo‘ylab millionlab kishilarga yordam beradi", - deya ta'kidladi bosh kotib. 

BMT Tinchlik fondi 2006 yilda 250 million dollar ustav kapitali bilan ta'sis etilgan. U urushni boshdan kechirgan mamlakatlarni qayta tiklash va tinchlikni mustahkamlash uchun sarflanadi. 

Ko‘proq yangiliklar: