AQShning Kaliforniya shtatida U-2 Dragon Lady ayg‘oqchi samolyoti halokatga uchrashi oqibatida bir nafar uchuvchi halok bo‘lgan, yana biri tan jarohati olgan, deb xabar qilmoqda Associated Press agentligi.

Hodisa, 20 sentabr kuni ertalab shtatning shimolida yuz bergan. Samolyot Bil aviabazasidan o‘quv parvozini amalga oshirgach, ko‘p o‘tmay, Sakramento shahridan 100 kmlar shimolroqdagi tog‘li hududga qulab tushgan. 

Xabar qilinishicha, uchuvchilar katapulta qilishgan, ammo yerga muvaffaqiyatli qo‘na olishmagan. 

U-2 samolyoti o‘ta yuqori balandliklardan aviarazvedka ishlarini olib borishi mumkin. U, 21 km balandlikkacha ko‘tarila oladi. U-2 bilan bog‘liq eng yodda qolarli voqea 1960 yil 1 mayda yuz bergan. O‘shanda, Geri Pauers boshqarayotgan ayg‘oqchi samolyot SSSR havo hujumidan himoya vositalari bilan Sverdlov oblastida urib tushirilgan.