Тошкент шаҳридаги Инҳа университети Эркин ва очиқ дастурий таъминот бўйича меморандум имзолади

Ўзбекистон 18 Июль 2016 3331

2016 йилнинг 14 июль куни Корея Республикаси ахборот технологиялари саноатини ривожлантириш миллий агентлиги (NIPA), “Электрон ҳукумат” тизимини ривожлантириш маркази, Тошкент ахборот технологиялари университети (ТАТУ) ва Тошкент шаҳридаги Инҳа университети (IUT) томонидан Эркин ва очиқ дастурий таъминот (ЭОДТ)ни ривожлантириш бўйича меморандум имзоланди.

ЭОДТни ривожлантириш бўйича ҳужжатни “NIPA” Президенти Юн ДжонгЛок, “Электрон ҳукумат” тизимини ривожлантириш маркази директори Шерзод Ҳабибуллаев, ТАТУ ректори Ўткир Ҳамдамов ва IUT ректори Шерзод Шерматовлар имзолашди.

Меморандумдан кўзланган асосий мақсад – ЭОДТдан фойдаланишни ва ўқитишни рағбатлантириш бўйича ўзаро ҳамкорлик асосларини яратиш ҳамда ЭОДТ муҳандисларини тайёрлашдир. 

Меморандум доирасида томонлар электрон ҳукумат тизимида ЭОДТни жорий этиш ҳамда турли тренингларни ташкиллаштириш орқали кадрларни тайёрлаш бўйича ҳамкорлик қилишга келишиб олишди.